Monday, July 25, 2011

To Zinda Ho Tum (Zindagi Na Milegi Dobara Poetry - Javed Akhtar)

Dilo mein tum apni betaabiyaan leke chal rahe ho

Toh zinda ho tum

Nazar mein khwaabon ki bijliyaan leke chal rahe ho

Toh zinda ho tum

Hawaa ke jhonkon ke jaise azad rehna seekho

Tum ek dariya ke jaise lehron mein behna seekho

Har ek lamhe se tum milo khole apni baahein

Har ek pal ik naya samaan dekhein yeh nigaahein

Jo apni aankhon mein hairaaniyaan leke chal rahe ho

Toh zinda ho tum

Dilon mein tum apni betaabiyaan leke chal rahe ho

Toh zinda ho tum

Dil aakhir tu kyu rota hai (Zindagi Na Milegi Dobara Poetry - Javed Akhtar)

Jab jab dard ka baadal chaya

Jab ghum ka saya lehraya

Jab aansoo palkon tak aaya

Jab yeh tanha dil ghabraya

Humne dil ko yeh samjhaya

Dil aakhir tu kyun rota hai

Duniya mein yunhi hota hai

Yeh jo gehre sannate hain

Waqt ne sabko hi baante hain

Thoda ghum hai sabka qissa

Thodi dhoop hai sabka hissa

Aankh teri bekaar hi nam hai

Har pal ek naya mausam hai

Kyun tu aise pal khota hai

Dil aakhir tu kyun rota hai

Ik baat hoton tak hai (Zindagi Na Milegi Dobara Poetry - Javed Akhtar)

Ik baat honton tak hai jo aayi nahin

Bas ankhon say hai jhaankti

Tumse kabhi, mujhse kabhi

Kuch lafz hain woh maangti

Jinko pehanke honton tak aa jaaye woh

Aawaaz ki baahon mein baahein daalke ithlaaye woh

Lekin jo yeh ik baat hai

Ahsaas hi ahsaas hai

Khushboo si hai jaise hawa mein tairti

Khushboo jo be-aawaaz hai

Jiska pata tumko bhi hai

Jiski khabar mujhko bhi hai

Duniya se bhi chupta nahin

Yeh jaane kaisa raaz hai

Zindagi Na Milegi Dobara Poetry - Javed Akhtar

Pighlay neelam sa behta hua yeh samaan

Neeli neeli si khamoshiyaan

Na kahin hai zameen

Na kahin aasmaan

Sarsaraati huyi tehniyaan, pattiyaan

Keh rahi hain ki bas ek tum ho yahaan

Sirf main hoon meri saansein hain aur meri dhadkanein

Aisi gehraiyaan

Aisi tanhaiyaan

Aur main sirf main

Apne honay pe mujhko yaqeen aa gaya

Followers